2025 展望（二）：美股

寫完關於香港樓市展望同預測，寫埋另外幾個我有投資嘅範圍吧。

首先講美股。過去連續兩年，S&P500 都有超過 20% 的回報。

可惜 2023 年我未開始投資，而 2024 年我係年中先開始接觸美股，所以都食唔晒個兩成回報。

不過相反咁睇，第一年開始投資遇著牛市都係好事掛，起碼就算係錯覺，都會覺得自己應該係有啲料到 ^_^”

anyway，咁 2025 年我又覺得會點呢？

2025 美股利好因素

其實 25年利好因素都真係多。

1 – Trump 上台。眾所周知佢係一個生意人，佢亦會用經濟同市場，去衡量自己做得好唔好。

加埋佢嘅減稅同緩和政策，基本上都係有利企業增長嘅。

仲有就係 America First 嘅政策，會讓其他國家發展減慢，Trump 當選後明顯見到，全球股市基本上都係跌。

黎緊相對全球資金都比較想集中美國，呢個趨勢只會更加勁。

不過政策面亦有風險部份，後面再詳細探討更多。

2 – Fed 美國聯儲局，宜家都係減息周期方案。

雖然預期減息次數近幾個月越黎越少，但係始終都係減緊，而且市場已 factor in 咗減息次數少咗呢個情況。

3 – AI 同科技發展

呢兩年好明顯 AI 科技有關嘅股，從 Nvidia 帶頭，好多都升到飛起。

咁有啲人就話係泡沫啦，好似 00 科網股咁，遲早要爆。

不過比較番，宜家嘅估值（PE等）其實無爆嗰陣咁癡線。

估值係唔係「貴」？都可以咁講嘅。不過估值永遠都係一個問題。

想估值平，可以買中國股，10 PE 以下嘅大企股大把，無人搶住去買。

最終可能好多錢都會嘥咗，但我深信 AI 科技係改變未來，而價值黎緊幾年會陸續出現。

所以特別 mega-cap，Mag7 呢啲，我係會繼續投資。

1 – 我諗最大風險，都莫過於通脹同利率。

Trump 政策係減少移民，增加關稅，呢啲都係會帶動通脹嘅政策。

通脹太高，Fed 就要被迫加息，對市場係一個負面影響。

另外本身美國財務都係赤字，短期內好難改變，所以要繼續印銀紙，當然亦係通脹壓力。

2 – recession

當然另一邊箱，如果就業變差，經濟衰退，企業利潤降低，都係股價跌一個嘅風險。

暫時黎講就無乜先兆指向呢個情況，不過 08 同 20 年爆之前，應該都未必太多先兆，所以總有呢個危機。

綜合各方面睇，如果照劇本減息兩次，我嘅預測係會升 10-20%，S&P500 全年可以去到 6500-7000。

不過一邊升，亦可能會有啲 -10% 嘅調整，最低有機會去到 ~5700 都唔定。

如果通脹太強，25年變咗一年都無減息，咁可能就會企穩或微升 6000-6500。

最大風險係反加息，不過我覺得機會比較微。加息的話，個市應該會跌，可能去番 5500 收尾。